ប៉ាពួញូវហ្គីណេ៖ នាយករដ្ឋមន្ត្រីនៃប្រទេសប៉ាពួញូវហ្គីណេ (Papua New Guinea) នៅថ្ងៃទី១១ ខែមករានេះ បានចេញមុខសន្យាថា លោកនឹងចេញមុខបង្ក្រាប "ភាពគ្មានច្បាប់ទម្លាប់" បន្ទាប់ពីមានមនុស្ស ១៥នាក់បានស្លាប់នៅក្នុងកុបកម្មក្នុងទីក្រុងធំៗចំនួនពីររបស់ប្រទេសនេះ។ គួរបញ្ជាក់ថា អំពើហឹង្សាបានផ្ទុះឡើងនៅក្នុងរដ្ឋធានី Port Moresby កាលពីល្ងាចថ្ងៃពុធ បន្ទាប់ពីក្រុមទាហាន ប៉ូលីស និងឆ្មាំពន្ធនាគារបានធ្វើការតវ៉ាប្រឆាំងនឹងរដ្ឋាភិបាល។

ហ្វូងមនុស្សខឹងសម្បារបានដុតបំផ្លាញអគារ និងរុះរើហាងនានាក្នុងអំឡុងពេលយប់ដែលពោរពេញដោយភាពចលាចល ហើយភ្លាមៗនោះបានបន្តរីករាលដាលដល់ចម្ងាយប្រមាណ ៣០០គីឡូម៉ែត្រឆ្ពោះទៅភាគខាងជើង នៅទីក្រុង Lae។ គិតត្រឹមរសៀលថ្ងៃព្រហស្បតិ៍ ស្នងការប៉ូលិសលោក David Manning បានបញ្ជាក់ថា យ៉ាងហោចណាស់មនុស្ស ១៥នាក់បានស្លាប់នៅក្នុងទីក្រុងធំៗបំផុតពីររបស់ប្រទេសនេះ។

នាយករដ្ឋមន្ត្រីប៉ាពួញូវហ្គីណេ លោក James Marape បានសម្តែងការសុំអភ័យទោសទៅកាន់ប្រជាពលរដ្ឋក្នុងប្រទេស ដោយលោកបាននិយាយថាការផ្ទុះឡើងនៃអំពើល្មើស និងបំពានច្បាប់ទម្លាប់យ៉ាងសម្បើមនេះ នឹងមិនអាចលើកលែង ឬអត់ឱនបានឡើយ។ លោកបានថ្លែងក្នុងសន្និសីទសារព័ត៌មានថា៖ "ខ្ញុំចង់បញ្ជាក់នៅថ្ងៃនេះឱ្យបានច្បាស់ទៅកាន់ប្រជាជន និងប្រទេសជាតិទាំងមូលថា នេះគឺជាប្រទេសរបស់អ្នកទាំងអស់គ្នា ហើយក៏ជាប្រទេសខ្ញុំផងដែរ។ អំពើល្មើស និងការបំពានច្បាប់ប្រទេស និងមិនទទួលបានលទ្ធផលល្អជាក់លាក់នោះឡើយ"។

គួរឱ្យដឹងថា ផ្អែកតាមទិន្នន័យរូបភាពវីដេអូបានបង្ហាញថា មានហ្វូងមនុស្សបានចូលទៅលួចឥវ៉ាន់ក្នុងហាង ដោយវាយកម្ទេចកញ្ចក់ទ្វារ និងបង្អួច និងស្រវាយកទំនិញផ្សេងៗដាក់ក្នុងកេសក្រដាស រទេះរុញទំនិញ និងក្នុងធុងជ័រជាដើម។ ក្រុមអ្នកបង្កភាពចលាចលក៏បានដុតអគារ និងរថយន្តនៅតាមផ្លូវ ថែមទាំងមានក្រុមអ្នកតវ៉ាប្រមូលផ្តុំគ្នានៅខាងក្រៅការិយាល័យនាយករដ្ឋមន្ត្រីក្នុងរដ្ឋធានី Port Moresby និងបានដុតបំផ្លាញឡានប៉ូលិសថែមទៀតផង។ 

រដ្ឋាភិបាលទីក្រុងប៉េកាំង បានដាក់ពាក្យបណ្ដឹងទៅកាន់រដ្ឋាភិបាលប៉ាពួញូវហ្គីណេបន្ទាប់ពីមានរបាយការណ៍ថាក្រុមកុបកម្មបានកំណត់គោលដៅអាជីវកម្មដែលគ្រប់គ្រងដោយជនជាតិចិន៕